Í tilefni af viðtali við Pétur Þór Jónasson í Morgunblaðinu 16. apríl 2020

Máli Eyþings og Péturs Þórs Jónassonar fyrrverandi framkvæmdastjóra lauk með sátt þann 27. janúar 2020. Málið var í kjölfarið kynnt fyrir sveitarstjórnum aðildarsveitarfélaganna og það afgreitt. Í sáttinni felst að deilum aðila er lokið og því óskiljanlegt að framkvæmdastjórinn fyrrverandi haldi áfram að flytja málið opinberlega.

Þar sem málinu er lokið hefur áður komið fram að stjórnarmenn hyggist ekki tjá sig frekar um málið en vegna þeirra rangfærslna sem fram komu í Morgunblaðinu 16. apríl 2020 teljum við okkur knúin til að gera eftirfarandi athugasemdir:

  • Stjórn Eyþings hefur aldrei sakað Pétur Þór Jónasson um kynferðislega áreitni á vinnustað, heldur þurfti stjórn að taka til meðferðar kvörtun undirmanns vegna óviðeigandi og ófaglegra samskipta. Orðið kynferðisleg áreitni er frá honum sjálfum komið.
  • Eyþing hafði lengi glímt við stjórnunar- og rekstrarvanda og um það hefur verið fjallað á mörgum fundum stjórnar og á aðalfundum auk þess sem gerð var úttekt á innra starfi Eyþings af óháðum aðila sem staðfesti það. Ásakanir Péturs Þórs um upplognar sakir sem átyllu til brottrekstrar eiga sér enga stoð í veruleikanum. 
  • Stjórn Eyþings hafði freistað þess að gera starfslokasamning við framkvæmdastjórann en samningar tókust ekki og í kjölfar uppsagnar fór málið því fyrir dómstóla. Það er sjálfsagður réttur aðila að leggja ágreiningsefni sín fyrir dómara til úrlausnar. Hins vegar tókst sátt milli aðila  og telst deilum aðila því endanlega lokið.
  • Málsmeðferð einstakra sveitarfélaga við afgreiðslu erindis Eyþings um hlutdeild í sameiginlegum kostnaði við greiðslu samkvæmt sáttinni er lokið. Þar sem um málefni starfsmanna Eyþings var að ræða taldi stjórn rétt að farið væri með gögn málsins sem trúnaðarmál, en aldrei hefur verið farið fram á að leynd ríki um kostnað.
  • Stjórn Eyþings hefur aldrei haldið því fram að Pétur Þór hafi farið fram á trúnað um dómsátt sem gerð var.
  • Staðhæfingar Péturs Þórs um að sátt hafi tekist milli hans og undirmanns eru ekki á rökum reistar.
  • Heildarupphæð kostnaðar af starfslokum framkvæmdastjóra helst óhjákvæmilega í hendur við þau starfskjör sem hann naut hjá Eyþingi.

Af okkar hálfu lauk málinu með sáttinni 27. janúar 2020 og í framhaldinu var það afgreitt af öllum 13 aðildarsveitarfélögunum og teljum við því ekki ástæðu til frekari umræðu um það.

Stjórn SSNE og fyrrum fulltrúar stjórnar Eyþings

 

-Hilda Jana Gísladóttir, bæjarfulltrúi Akureyri (formaður)

-Kristján Þór Magnússon, sveitarstjóri Norðurþings (varaformaður)

-Helga Helgadóttir, bæjarfulltrúi Fjallabyggð

-Helgi Héðinsson, oddviti Skútustaðahrepps

-Eva Hrund Einarsdóttir, bæjarfulltrúi Akureyri

-Sigurður Þór Guðmundsson, oddviti Svalbarðshrepps

-Elías Pétursson, þáverandi sveitarstjóri Langanesbyggðar

-Katrín Sigurjónsdóttir, sveitarstjóri Dalvíkurbyggðar

-Sóley Björk Stefánsdóttir, bæjarfulltrúi Akureyri

-Axel Grettisson, oddviti Hörgársveitar

-Guðmundur Baldvin Guðmundsson, bæjarfulltrúi Akureyri